Kæra þarf að vera skrifleg
Kæru og gögn skal senda í gegnum Mínar síður sem er bæði fljótlegt og öruggt. Innskráning á Mínar síður er með rafrænum skilríkjum og er því ekki nauðsynlegt að undirrita kæruna með eigin hendi. Athugið þó að ef fleiri en einn standa að kæru þarf umboð að berast frá öðrum kærendum.
Einnig er hægt að senda kæru með tölvupósti á [email protected] og þarf kæran þá að vera undirrituð eigin hendi. Ef fleiri en einn kæra þurfa allir að skrifa undir kæruna nema sá sem skrifar undir kæruna leggi fram umboð um að hann hafi heimild til að undirrita kæruna fyrir hönd annarra kærenda. Skrifi lögmaður undir kæru fyrir hönd kæranda eða kærenda þarf eftir sem áður að leggja fram umboð, m.ö.o. gildir málflutningsumboð dómstóla ekki fyrir nefndinni.
Mikilvægt er að fram komi í kæru hvaða ákvörðun sé kærð, hvernig hún snerti hagsmuni kæranda og hvaða kröfur séu gerðar, t.d. að ákvörðunin sé felld úr gildi. Æskilegt er að gögn sem varða málið fylgi kærunni, þá sérstaklega sú ákvörðun sem kæra beinist að. Jafnframt er óskað eftir að fylgiskjöl séu merkt og skrá um þau ef þess er kostur. Sérstaklega er það þegar vísað er í þau í kæru, umsögn, greinargerð eða athugasemdum. Heppilegt er að vísa til kæruheimildar í lögum ef kæranda er kunnugt um hana.
Kærufrestur er almennt einn mánuður frá því kæranda varð kunnugt um eða mátti vera kunnugt um þá ákvörðun sem kæra skal. Sé um að ræða ákvarðanir sem sæta opinberri birtingu telst kærufrestur frá birtingunni.
Frá 1. nóvember 2025 hefur nefndin tekið upp rafræn skil til Þjóðskjalasafns Íslands. Óskast því kærum, greinargerðum og gögnum skilað eingöngu rafrænt í gegnum Mínar síðar eða á netfangið [email protected] og því ekki þörf á að senda á pappír. Ef ekki eru tök á að skila inn kæru rafrænt þá er tekið á móti henni og öðrum pappírsgögnum á skrifstofu úrskurðarnefndarinnar að Borgartúni 21, Reykjavík.
Vakin er athygli á því að berist úrskurðarnefndinni beiðni um að afhent verði kæra og gögn kærumáls er úrskurðarnefndinni skv. 5. gr. upplýsingalaga nr. 140/2012 skylt að verða við henni að teknu tilliti til þeirra undantekninga sem greinir í 6.–10. gr. sömu laga.
